《我細佬訂左8個mon》
成日話香港人病仲大獲過死，我認同，特別係細佬依家基本上無左自理能力之後，有好多要做既野無做到，你就要幫佢pick up返。
大部份香港人都會有信用卡，銀行戶口等等，而我發現最難處理就係銀行事宜，我地知佢有幾張卡，但自從郵寄月結單變成網上銀行之後，我地無收過有關信件，上一排我地帶佢去銀行一問，發現佢差唔多欠費三萬蚊，即時嚇咗我地一跳……
好彩佢戶口都仲有錢可以交，但佢無自動轉帳，所以欠左成兩三個月無交信用卡單，又罰息又罰手續費，幫佢交完之後我地醒起一個問題，佢自從十二月頭就已經唔太清醒，到底佢買左乜成幾萬蚊。
打去hotline問，當然等左我差唔多半個鐘，然後對資料時佢知我唔係卡主本人，佢唔可以幫我睇買左乜，唯有叫細佬佢簡單講下資料，真係要一句教佢講，佢再重覆一次……
好彩職員好幫手，佢知我地情況之後都好有耐心，真係要讚一下行山銀行既服務。
查完之後，發現佢十二月係kickstarter係主要購買既來源，我地登入佢網上帳號，呢度要插口一句，有冇諗過如果自己突然有乜事時，網上所有野無人知道會點？好似我老婆阿姨之前過身，我地想將佢個facebook轉做紀念帳號都登入唔到。
我推薦一個apps叫last pass，佢登入之後可以save低所有之前用過既帳號同密碼，而因為咁我地先可以減輕好多麻煩，非廣告，純粹佢真係幫左件事好多。
講返kickstarter，有用開既都知係一個眾籌網頁，主要係賣新科技等等產品，細佬一向都係電子迷，佢訂唔出奇，但我地一睇，發現佢訂左一個便攜式既mon，除此以外，仲有五六樣唔同既產品……
我睇完之後問佢
你記唔記得自己上網訂左好多野啊？
唔係好記得……
咁你記唔記得自己訂左個mon？仲有部摺疊式單車？仲有耳機？仲有幾樣啊？
佢一臉茫然
阿媽佢好緊張咁話可唔可以退錢，我問細佬，咁你依家仲想唔想買呢d野啊？如果你想買既我就唔取消佢喇。
佢話要，咁我再睇睇資料，佢個mon要成15845咁貴，我心諗咩mon咁貴，睇清楚之後先發覺佢係買左8個……
個一刻，我問佢，你想要既，我地照要啦，但你訂左8個mon喎傻豬，你係咪有用定係禁錯左啊？
佢無答我
而我下一秒已經忍唔住笑，個傻豬竟然訂左8個mon，8個喎，揸高達咩？然後我就行左入廁所係咁喊……
當自己親人唔清醒地做錯左事，唔係要怪佢，而係好嘆息好沉重，原本佢好醒目，屋企好多野都係佢幫手，以前係佢教我用網上稅務易……但依家佢連自己做左乜都唔知……
早排佢連電話都用唔到，我問佢做乜，佢話鎖左開唔返，連卡都鎖埋，我幫佢換左之後停左個鎖等佢可以用。
唔……好似好無總結咁，就當我想記錄返一件咁既事，一個會傻下傻下唔小心訂左8個mon既傻豬仔。
我估，呢個mon佢真係好鐘意同覺得好好……
Search